Toshkent, 2024-yil 6-dekabr — AVO bank O‘zbekistondagi BMT Taraqqiyot Dasturi (UNDP) bilan memorandum imzoladi. Bu hujjat bankning raqamli iqtisodiyot sohasida ayollarga kasbiy rivojlanish imkoniyatlarini taqdim etuvchi istiqbolli ish beruvchi sifatidagi nufuzini mustahkamlashda muhim qadam bo‘ldi.
Qizlar uchun IT va raqamli amaliyot dasturi BMTTD hamda O‘zbekiston Respublikasi Iqtisodiyot va moliya vazirligining «Raqamli iqtisodiyot va raqamli tadbirkorlikni rivojlantirish uchun yoshlar imkoniyatlarini kengaytirish» qo‘shma loyihasi doirasida amalga oshirilmoqda. Loyihaning asosiy yo‘nalishlaridan biri — ayollar orasida kasbiy IT-kompetensiyalarni oshirish va raqamli texnologiyalar sohasida gender tengligini qo‘llab-quvvatlashdan iborat.
Ilk tashabbus yakunlari
AVO bank dastur doirasida BMTTD bilan hamkorlikda birinchi tashabbusni amalga oshirdi. BMTTD ishtirokchilarni tanlash va tayyorlashda asosiy vazifani bajarib, professionallik, raqamli vositalar bilan ishlash va samarali muloqot kabi mavzularga bag‘ishlangan yo‘naltirish sessiyalarini tashkil etdi. Bundan tashqari, BMTTD amaliyot jarayonini kuzatib bordi, fikr-mulohazalarni to‘pladi va dastur samaradorligini oshirish uchun takomillashtirishlarni joriy etdi.
AVO bank ishtirokchilarga o‘z jamoalarida amaliy ish bilan shug‘ullanish imkoniyatini yaratdi. Bu yerda ular o‘z bilimlarini IT va raqamli texnologiyalar sohasidagi real loyihalarda qo‘llay olishdi. Har bir amaliyotchiga zarur ko‘mak ko‘rsatuvchi va qulay ish muhitida ularning kasbiy salohiyatini ro‘yobga chiqarishga yordam beruvchi ustoz tayinlandi.
Loyihada ishtirok etganlar:
Yakuniy tadbir: Demo Day
6-dekabr kuni Toshkent shahridagi Hyatt Regency mehmonxonasida amaliyotchilarni taqdirlash marosimi bo‘lib o‘tdi. Unda ishtirokchilar AVO bankdagi o‘z ishlari natijalarini taqdim etdilar. Tadbir doirasida ustozlar bilan munozara o‘tkazildi. Ular amaliyot jarayoni haqidagi taassurotlari bilan o‘rtoqlashib, ishtirokchilar uchun keyingi tavsiyalarni muhokama qildilar. Shuningdek, ustoz va dastur hamkorlariga minnatdorchilik sertifikatlari, ishtirokchilarga esa ishtirokini tasdiqlovchi diplomlar topshirildi.
Tadbir mehmonlari orasida BMT Taraqqiyot dasturining O‘zbekistondagi doimiy vakili Akiko Fudzii, shuningdek, OAV vakillari bo‘lib, ular bilan norasmiy vaziyatda ziyofat davomida suhbatlashish imkoniyati yaratildi.
Dastur natijalari
Dastur ishtirokchilari nafaqat IT va raqamlashtirish sohalarida amaliy tajriba, balki tarmoqlashish va o‘zini namoyon qilish bo‘yicha foydali ko‘nikmalar ham orttirdilar. Amaliyotchilardan birining sa’y-harakatlarini e’tirof etgan holda, AVO bank unga ish taklif qildi. Bu esa AVO bankning yosh mutaxassislarni qo‘llab-quvvatlashi va ularning salohiyatini rivojlantirish uchun zarur shart-sharoitlarni taqdim etishga tayyor ekanligining isbotidir.
Hamkorlikdagi loyiha O‘zbekistonda IT va raqamli iqtisodiyotda ayollarning ishtirokini qo‘llab-quvvatlash, shuningdek, ushbu sohada gender tafovutini kamaytirishga hissa qo‘shdi. Mazkur memorandum doirasida kelajakda ayollarga IT va raqamli texnologiyalar sohasida yangi imkoniyatlarni taqdim etish, kasbiy o‘sishga yo‘l ochuvchi loyihalarni amalga oshirish rejalashtirilgan.
