Yangi ishga joylashgan, mustaqil faoliyatni boshlagan yoki shunchaki moliyaviy holatingizni tartibga keltirishga qaror qilgan bo‘lsangiz, bank hisobvarag‘i nafaqat foydali, balki zaruriy ehtiyojga aylanadi. Ayniqsa, 2025-yilda to‘lovlarning aksariyati bir nechta tugmani bosish orqali amalga oshiriladigan, naqd pul esa karta va telefonlarga o‘z o‘rnini bo‘shatib berayotgan davrda bu katta ahamiyatga ega.
Keling, O‘zbekistonda ortiqcha qiyinchiliklarsiz qanday hisob ochish mumkinligini ko‘rib chiqamiz.
Qanday hujjatlar kerak bo‘ladi?
Bankda birinchi bo‘lib sizdan pasport so‘rashadi. O‘zbekiston fuqarolariga oddiy ichki pasport, chet elliklarga esa xorijga chiqish pasporti kerak bo‘ladi. Ba’zida STIR ham so‘rashlari mumkin. Agar ish haqi hisobini ochmoqchi bo‘lsangiz, ish joyingizdan ma’lumotnoma yoki mehnat shartnomasini talab qilishlari mumkin.
Lekin qo‘rqmang — bu hujjatlarni yig‘ish unchalik qiyin emas. Bundan tashqari, bank xodimlari odatda aynan nimalar kerakligini o‘zlari tushuntirib berishadi. Aytgancha, ba’zi banklar ma’lumotlarni avtomatik tarzda — identifikatsiya tizimi orqali olishni o‘rganishgan. Shu sababli, hech qanday hujjatni qog‘ozga chiqarishingiz shart bo‘lmasligi ham mumkin.
Filialning o‘zida nima bo‘ladi?
Bankka ko‘pincha oldindan yozilmasdan, shunchaki navbat bilan kelasiz. Bank xodimi sizni kirish joyida kutib oladi, nima kerakligini so‘raydi va kerakli mutaxassisga yo‘naltiradi.
Keyin birgalikda sizga mos keladigan hisobni tanlaysiz. Masalan, agar faqat internet uchun to‘lov qilmoqchi, telefoningizni to‘ldirmoqchi va qarindoshlaringizdan pul olmoqchi bo‘lsangiz, oddiy joriy hisobvaraq mos keladi. Agar pul yig‘moqchi bo‘lsangiz, omonat ochishadi. Bularning barchasini joyida tushuntirib berishadi.
Keyin anketa to‘ldirishingizni, shartnomani o‘qishingizni so‘rashadi (ha, hatto shunchaki imzo qo‘yishni xohlasangiz ham, uni o‘qib chiqqaningiz yaxshi) va bo‘ldi. Bir necha daqiqadan keyin shaxsiy hisobingizning baxtli sohibiga aylanasiz. Ba’zan kartani shu zahoti olish mumkin, ba’zan esa bir necha kun kutishingiz kerak bo‘ladi.
Hisobni uydan turib ochish mumkinmi?
Ha, 2025-yilda bu qandaydir g‘ayrioddiy narsa emas. Ilovani yuklab olib, oddiy identifikatsiyadan o‘tasiz (ko‘pincha pasportingiz va o‘zingizning suratini olishingiz kerak bo‘ladi), ma’lumotlarni to‘ldirasiz — bo‘ldi. Bir necha daqiqada hisobingiz tayyor bo‘ladi.
Bu usul bank filialidan uzoqda yashasangiz, tez-tez safarda bo‘lsangiz yoki shunchaki navbatda turishni yoqtirmasangiz yordamga keladi. Bir tanishimiz taksida ketayotib hisobvaraq ochdi-yu, yarim soat o‘tmasdan ilova orqali kommunal uchun to‘lov qildi.
Pul ishlasin — siz esa qulay nazorat qiling
AVO omonatini oching, yillik 25% gacha daromad oling va uni ilova orqali oson boshqaring
Keyin afsuslanmaslik uchun bankni qanday tanlash kerak?
Qisqa qilib aytganda, qulaylikka e’tibor bering. Ilovaning qanchalik tushunarli ekanligi, pul o‘tkazmalari uchun komissiya olinishi yoki olinmasligi, muammolar qanchalik tez hal etilishini tekshiring. Bir bank ajoyib karta taklif qilishi mumkin, lekin tizimida doimo uzilishlar bo‘lib turadi. Boshqasida esa hamma narsa barqaror ishlaydi, lekin ofislari uzoqda joylashgan.
Mijozlar fikrlarini o‘qing, tariflarni ko‘rib chiqing, do‘stlaringizdan so‘rang. Ba’zan shaxsiy tajriba har qanday maslahatlardan ham yaxshiroq bo‘ladi. Esda tuting: bank hisobi — tatuirovka emas. Agar bank sizga yoqmasa, istagan vaqtingiz boshqasiga o‘tishingiz mumkin.
Xulosa
O‘zbekistonda bank hisobi ochish endi 10 yil avvalgidek qog‘ozbozlik bilan bog‘liq murakkab jarayon emas. Hamma narsa ancha osonlashdi, tezlashdi va tushunarliroq bo‘ldi.
Agar ishga aql bilan yondashsangiz, bu jarayon bir soatdan ham kam vaqt oladi. Buning evaziga siz internetdan tortib ayrongacha hamma narsani to‘lash, bir nechta tugmani bosish orqali pul o‘tkazish va naqd pulni qayerda saqlash haqida tashvishlanmaslik imkoniyatiga ega bo‘lasiz.
Shuning uchun kechiktirmang — pul sizga xizmat qilsin, aksincha emas.
