Yakkakurash turlaridan boks so‘nggi paytlarda nafaqat professional, balki havaskorlik toifalarida ham tobora ommalashib bormoqda. Yaqinda mashg‘ulotlarimni qayta boshlab, bir oy davomida turli sport zallarida bo‘ldim va turli murabbiylar bilan shug‘ullandim. Bu qanchaga tushgani, qanday xulosalar chiqarganim va nimalarni tanlaganim haqida quyida batafsil yozib o‘taman.
Boshlash uchun nimalar kerak (jihozlar)
Hatto eng boshida ham boks qo‘lqoplari, bintlar, shlem va kapa kabi minimal jihozlar kerak bo‘ladi.
Bokschilarning poyabzali va kiyimi — shaxsiy tanlov. Qolgan barcha narsalar xavfsizlik uchun zarur atributlardir. Kapa tishlarni, shlem esa yuzni himoya qiladi. Shlem bosh chayqalishidan to‘liq asramasa-da, yuzda shilinish, ko‘karish va tirnalishlar paydo bo‘lishidan saqlaydi. Bintlar esa barmoq bo‘g‘inlari va bilakni himoya qiladi.
Bunday asosiy jihozlarga o‘rtacha 700 000–800 000 so‘m sarflashga to‘g‘ri keladi.
Mashg‘ulotlar narxi qancha
Men narxlarni 3 toifaga bo‘lgan bo‘lardim:
- Klubda guruhli mashg‘ulotlar
- Murabbiy bilan yakka tartibdagi mashg‘ulotlar
- Sport agregatorlari orqali mashg‘ulotlar
Klubda guruhli mashg‘ulotlar
Mashg‘ulotlarning eng yoqimli turi. Klubda jamoa ruhi, sog‘lom raqobat va birgalikda o‘sish hissi mavjud. Klublarning ko‘pincha o‘ziga xos madaniyati bo‘ladi, shuning uchun o‘zingizga mosini topish muhim. Klublar turli toifada, narxda va muhitda bo‘ladi. Biz ko‘tarilayotgan boks yulduzlarini ko‘rishga o‘rganib qolgan yerto‘lalardan tortib, yaqinda O‘zbekiston bozoriga kirib kelgan Floyd Meyvezerning premium tarmoq zaligacha.
Yakka tartibdagi mashg‘ulotlar boksni kardiomashq sifatida qabul qiladigan va texnikasini yaxshilashni xohlovchilar uchun mos keladi. Odatda, yakkama-yakka mashg‘ulotlarning asosiy qismini lapa bilan ishlash tashkil etadi. Bu texnika, tezlik va chidamlilikni rivojlantirishga yordam beradi, lekin bu bilan cheklanib qolmaydi. Havaskor darajasidagi bokschilar uchun lapa bilan ishlash — bu butun mashg‘ulotlar majmuasining faqat bir qismidir.
Seksiya tanlashda nimalarga e’tibor qaratish kerak
- 20 kishidan ortiq odam mashq qiladigan zallarni tanlamang. Bunday zallardagi murabbiylar faqat hayotini shunga bag‘ishlashga tayyor bo‘lgan istiqbolli sportchilarga e’tibor berishadi. U yerda havaskorlar bilan ishlashga vaqt yo‘q.
- Agar sizga biror zal ma’qul kelsa, u fitnes agregatorlaridan birida mavjudligini tekshiring. Bu, albatta, xarajatlaringizni tejaydi.
- 2–3 kishi keladigan zallar boshlash uchun qulay. U yerda sizga e’tibor berishadi, boks maktabini o‘rgatishadi. Biroq, bunday zallar keyingi rivojlanish uchun mos kelmaydi.
Yanada yuqori daraja
Ba’zi klublar «Ochiq ring» musobaqalarini o‘tkazadi, bu yerda har qanday xohlovchi o‘z vazn toifasi va tayyorgarlik darajasidagi raqiblar bilan ishtirok etib, boks bo‘yicha bellashishi mumkin.
Shuningdek, istiqbolli bokschilarni ilgari surish bilan shug‘ullanadigan promoushen kompaniyalari ham mavjud. Shunday kompaniyalardan biri «Akhmad Boxing» klubidir. Ularning sportchilari musobaqalarda qatnashib, o‘z karyeralarini rivojlantirmoqda.
Mustaqil shug‘ullanish
Hech qachon boks bilan shug‘ullanmaganlar uchun texnikani o‘z ichiga olgan mustaqil mashg‘ulotlarni boshlash qiyin, ammo «jismoniy tayyorgarlik»ni rivojlantiruvchi mashqlar juda foydali bo‘ladi. Bokschilarning asosiy mashqlari — sakraydigan arqon, yugurish va rezina tasma mashqlari. Bularning barchasi ko‘chma, qulay va mustaqil mini-mashg‘ulotlar uchun juda mos keladi.
Jadvalda Toshkent shahrida boks mashg‘ulotlarining o‘rtacha narxlari hamda mashg‘ulotlarni boshlash uchun zarur xarajatlar ko‘rsatilgan:
Nomi | Summasi |
Jihozlar | 700 000–800 000 |
Mustaqil mashqlar uchun anjomlar (ixtiyoriy) | 200 000 |
Guruhli mashg‘ulotlar uchun abonement (12 ta dars) | 1 000 000–1 500 000 |
Shaxsiy mashg‘ulotlar | 1 500 000–2 500 000 |
Agregatorlar orqali mashg‘ulotlar (bir oylik) | 400 000–500 000 |
*Maqoladagi ma'lumotlar nashr etilgan vaqt uchungina amal qiladi. AVO bank ushbu ma'lumotlar kelajakda ham xuddi shunday va dolzarb bo'lib qolishiga kafolat bermaydi. Qaror qabul qilishdan oldin eng so'nggi ma'lumotlarni tekshirishingizni maslahat beramiz.
*Maqoladagi fikr — muharrirning shaxsiy fikri bo'lib, u AVO bank pozitsiyasini ko'rsatmaydi. Bank ma'lumotlar to'g'riligi va undan foydalanish oqibatlari uchun javobgarlikni o'z zimmasiga olmaydi.
*Narxlar taxminiy va faqat nashr etilgan vaqtdagina amal qiladi.
