Hisobraqamni yopish — bir qarashda oddiy tuyuladi. Lekin ariza yozishdan oldin bir daqiqa to‘xtab, o‘ylab ko‘ring: rostdan ham u sizga endi kerak emasligiga ishonchingiz komilmi? Ba’zida hisobraqam shunchaki ro‘yxatda «xalaqit beradi» deb o‘ylashingiz mumkin, lekin u hamon to‘lovlar, obunalar yoki soliq majburiyatlariga bog‘langan bo‘lishi mumkin.
Masalan, kishi dolzarbligini yo‘qotgan loyiha uchun hisobraqam ochgan bo‘lishi mumkin. Yoki shunchaki qulayroq ilovasi bor boshqa bankka o‘tishga qaror qilgandir. Balki kompaniya yopilayotgandir va barcha rasmiyatchiliklarni tugatish vaqti kelgandir. Sabablar turli xil bo‘lishi mumkin — muhimi, qaror shoshma-shosharlik bilan qabul qilinmasligi kerak. Yaxshisi, bu hisobraqamda qoldiqlar: qarzlar, avtomatik to‘lovlar, bog‘langan xizmatlar qolmaganini oldindan sinchiklab tekshirib chiqing.
Ariza berishdan oldin nima qilish kerak?
Aytaylik, barchasini yaxshilab o‘ylab chiqib, haqiqatan ham hisobraqamni yopish vaqti kelganini tushundingiz. Jarayon cho‘zilib ketmasligi uchun bir necha bosqichni bajarish muhim. Avvalo, hisobraqamingizda qarzdorlik yoki kutilmagan yechib olishlar yo‘qligiga ishonch hosil qiling. Ba’zida arzimas komissiya eng noqulay paytda paydo bo‘lib, hisobraqamni yopish jarayonini to‘xtatib qo‘yishi mumkin.
Agar hisobraqamingizda pul qolgan bo‘lsa, uni boshqa hisobraqamga o‘tkazing yoki naqd qilib oling. Ba’zi banklarda buni ilova orqali, boshqalarida esa faqat ofisda amalga oshirish mumkin. Agar hisobraqam biznes uchun ishlatilgan bo‘lsa, sizga pul o‘tkazadigan barcha shaxslarni: mijozlar, hamkorlar, ta’minotchilarni ogohlantirishni unutmang.
Hamma narsa tayyor bo‘lgach, ariza topshirish mumkin. Ko‘plab banklar buni onlayn bajarish imkoniyatini beradi, lekin ko‘pincha shaxsan tasdiqlashni talab qilishadi: ofisga borish, qo‘ng‘iroq qilib video orqali yoki maxsus kod bilan tasdiqlash kerak bo‘ladi.
Hisobraqamni yopish kredit tarixiga ta’sir qiladimi?
Shaxsiy hisobraqam haqida gap ketganda — ehtimoli kam, lekin ehtiyotkorlik zarar qilmaydi. Masalan, agar hisobraqam kredit karta bilan bog‘langan bo‘lsa-yu, siz uni yopishni unutgan bo‘lsangiz, bu hisobotda ko‘rinishi mumkin. Ayniqsa, sizda kredit mahsulotlari, avtomatik to‘lovlar yoki jarimalar bo‘lgan bo‘lsa, barcha masalalarni puxta yakunlash juda muhim.
Yuridik shaxslar uchun esa vaziyat ancha qiyinroq. Biznes yopilayotganda, agar biror narsa to‘g‘ri rasmiylashtirilmagan bo‘lsa, bank ma’lumotni soliq idorasiga yoki hatto kredit tarixi byurosiga yetkazishi mumkin. Shuning uchun hisobraqamni shunchaki yopish emas, balki uni to‘g‘ri — dalolatnomalar, tasdiqnomalar bilan va hech qanday qoldiqlarsiz yopgan ma’qul.
Bir nechta oddiy maslahatlar
Hisobraqam yopilgandan keyin, yana bir-ikki muhim ishni bajarishni unutmang. Birinchidan, bankdan olingan barcha ariza va xatlarning nusxalarini saqlab qo‘ying. Bu agar kimdir: «Biz hech narsa olmadik,» deb aytsa, sizning himoyangiz bo‘ladi. Ikkinchidan, bank sizga og‘zaki emas, balki yozma ravishda tasdiqnoma yuborganiga ishonch hosil qiling.
Agar hisobraqamingizdan onlayn xizmatlarda foydalangan bo‘lsangiz (masalan, striming yoki yetkazib berish uchun to‘lov), u yerdagi rekvizitlarni o‘zgartiring. Ba’zida hisobraqam yopilgan bo‘lsa-da, obuna undan pul yechib olishga urinishda davom etadi va siz to‘lovni kechiktirganingiz haqida xabarlar olasiz.
Keyin-chi?
Hisobraqamni yopib, hamma ishlarni hal qilganingizdan keyin, kelajak haqida o‘ylash imkoni tug‘iladi. Agar yangi bank izlayotgan bo‘lsangiz, takliflarni taqqoslang. Tariflar, ilova qulayligi, pul o‘tkazmalari uchun to‘lovlarga e’tibor qarating. Ba’zida bank almashtirish — pulni yanada samaraliroq boshqarish yo‘lidagi qadam bo‘ladi.
Agar endi hisobraqam ochishni rejalashtirmayotgan bo‘lsangiz, ozgina vaqtdan keyin bank bazasida hech qanday «osilib qolgan» masalalar qolmaganini tekshirib ko‘ring. Ayniqsa, gap biznes haqida ketganda, buni unutmang.
Muhim qarorlar 1 qadamdan boshalanadi
Hisobraqamni yopish stress uchun sabab bo‘lmasligi kerak. Bu oddiy, lekin muhim jarayon. Unga sovuqqonlik bilan yondashing, shoshilmang, har bir tafsilotni tekshiring — shunda hamma narsa tinch va tez o‘tadi.
Hisobraqam eshikka o‘xshaydi. Uni nafaqat o‘zingiz ortidan, balki yuzaga kelishi mumkin bo‘lgan muammolar ortidan ham yopasiz. Eng muhimi, barcha narsa o‘z o‘rnida qolganiga ishonch hosil qilishdir.
