Toshkent, 2025-yil 14-avgust
AVO.uz’ga yangi xalqaro hamkor qo‘shildi. Fonte Capital Ltd boshqaruvidagi Fonte Hedge Fund OEIC Ltd AVO bank AJ’ning 100% aksiyalariga egalik qiluvchi AVO.uz kompaniyasining ustav kapitalidagi 50% ulushini sotib oldi.
Mijozlar uchun bu yangilik rivojlanish sur’atlarini tezlashtirilishi, texnologiyalar takomillashtirilishi va raqamli mahsulotlar ro‘yxati kengaytirilishini anglatadi.
AVO bank — O‘zbekistondagi birinchi to‘liq raqamli banklardan biri bo‘lib, u qulay mobil ilova orqali self-service formatini jonli va professional qo‘llab-quvvatlash bilan uyg‘unlashtiradi. Bank odamlar va biznesga moliyaviy masalalarini ortiqcha qiyinchilik va navbatlarsiz boshqarishga yordam beradigan xizmatlarni yaratadi.
«Fonte Hedge Fund OEIC Ltd bilan hamkorlik — bu jahonning ilg‘or fintex amaliyotlarini joriy etish uchun yangi imkoniyatlarni taqdim etadigan strategik qadam. Birgalikda biz innovatsion g‘oyalarni qisqa vaqt ichida hayotga tatbiq etishimiz, xizmat ko‘rsatish sifatini yaxshilashimiz va mijozlarimizga yanada qulay hamda zamonaviy yechimlarni taklif qilishimiz mumkin», — deya ta’kidlashdi AVO bank vakillari.
Hamkorlikning moliya bozoridagi ahamiyati
Hozirda O‘zbekistonda fintex sohasida o‘zgarishlar katta: onlayn-banking qamrovi kengaymoqda, to‘lov tizimlari rivojlanmoqda, kreditlash esa raqamli formatga o‘tmoqda. Texnologik jihatdan rivojlangan yosh va faol aholi, shuningdek, davlat tomonidan ko‘rsatilayotgan imkoniyatlar iqtisodiyotning raqamli o‘zgarishi uchun qulay sharoit yaratmoqda.
Fonte Hedge Fund OEIC Ltd bosh direktori Yerjan Musin quyidagilarni ta’kidladi:
AVO bank’ga qilingan sarmoya — istiqbolli sohalarda barqaror portfelni shakllantirish bo‘yicha uzoq muddatli strategiyamizning bir qismi. Biz O‘zbekistonda fintex va raqamli banking sohasining yuqori salohiyatini ko‘ryapmiz va ularning taraqqiyotiga ishonamiz. Biz kompaniyalarni har tomonlama ekspertizadan o‘tkazdik, mustaqil baholovchi tomonidan baholash xulosasini oldik va tartibga soluvchi organlar bilan barcha zarur kelishuvlarni amalga oshirdik. Bu esa o‘z o‘rnida tanlovimizga bo‘lgan ishonchni yanada mustahkamladi. Men AVO bank jamoasi va mahsulotlari bilan yaxshi tanishman. Bu bozor talabiga mos zamonaviy yechimlarni yaratayotgan kuchli va professional jamoa. Aynan shu sababli sarmoya kiritishga qaror qildik — hamkorlik bank salohiyatiga va ushbu sohaga keng ko‘lamli yangiliklar kiritishiga ishonamiz
Fonte Capital Ltd haqida
Fonte Capital Ltd — 2022-yil yanvar oyida «Ostona» Xalqaro Moliya Markazida ro‘yxatdan o‘tgan boshqaruvchi xususiy investitsiya kompaniyasi. Kompaniya investitsiya fondlarining diversifikatsiyalangan portfelini boshqarib, turli aktivlar sinflarida kapitalning barqaror o‘sishini ta’minlaydi.
