Men doimo sevimli mashg‘uloti bor odamlarga ozgina havas qilardim. Xobbi uchun menga hamisha yo pul, yo vaqt, yo sabr-toqat yetishmasdi. Albatta, vaqti-vaqti bilan biror narsaga qiziqib qolaman, lekin hozircha meni jiddiy ravishda o‘ziga jalb qiladigan mashg‘ulot topolganim yo‘q.
Biroq atrofimdagi odamlar orasida tangodan tortib, to‘qishgacha, postkrossingdan tortib, yapon sumi-e san’atigacha bo‘lgan turli sohalarda uzoq vaqt davomida jiddiy shug‘ullanuvchilar uchraydi. Ishqiboz odamlar sevimli mashg‘ulotlariga ko‘p pul va kuch sarflashga tayyor, buning evaziga esa ular bebaho baxt tuyg‘usini his etishadi.
Ayniqsa, Toshkent uchun g‘ayrioddiy bo‘lgan qiziqishlar meni o‘ziga jalb etadi. Men turli xil odamlardan o‘zlarining sevimli mashg‘ulotlari va hamfikrlarini qanday topganlari, sevimli mashg‘ulotlaridan nimalar olishlari va bu mashg‘ulotlarga qancha mablag‘ sarflashlari haqida so‘rab-surishtirdim.
Baxt ultratovushlari
Sevara 22 yoshda, u We Digital agentligida loyiha boshqaruvchisi bo‘lib ishlaydi va 8 yildan buyon K-POP bilan qiziqib kelmoqda.
Foto: Sevara
K-pop — bu 90-yillar boshida Janubiy Koreyada paydo bo‘lgan va 2000-yillardan boshlab butun dunyoda ommalashgan musiqa janri. Bugungi kunda u butun bir subkulturaga aylangan. Muxlislar musiqa tinglaydilar, kaver-guruhlarga yig‘iladilar, raqs bilan shug‘ullanadilar, sevimli ijrochilarning albomlari va kartalarini to‘playdilar, konsert merchini yoki aydollar (mashhur artist yoki yulduz) reklama qilayotgan kosmetikani sotib oladilar, sevimli musiqachilarning tug‘ilgan kunlarini nishonlaydilar.
O‘zbekistonda ushbu janr muxlislari ko‘p, hatto Koreya elchixonasi huzurida K-pop uyushmasi va Ta’lim markazi ham mavjud bo‘lib, ular turli tadbirlar uyushtiradi.
Eng keng tarqalgan merch — bu albom bo‘lib, unda fotoalbom (ishtirokchilarning suratlari joylashgan buklet), qo‘shiq matni, ba’zan disk va kartalar mavjud. Odatda, muxlislar o‘z sevimli ijrochilarining kartalarini to‘playdilar, ayirboshlaydilar yoki alohida sotib oladilar. Qaysi kartalar ma’lum bir albomga tushishi noma’lum bo‘ladi.
«Men uchun kolleksiya to‘plash — bu hissiyotlar ummoniga o‘xshaydi. Ochish jarayonidan zavqlanaman, har bir kartani diqqat bilan ko‘zdan kechiraman. Qaysi karta chiqishini hech qachon bilmayman: agar sevimli ijrochimning kartasi bo‘lmasa, xafa bo‘laman, aksincha bo‘lsa, quvonaman. Albomni ochayotganimda guruhning sevimli a’zosining kartasini ko‘rganimni aks ettirgan video bor — u yerda shunchaki baxtdan qichqirib yuborganman!
Bundan tashqari, kolleksiya to‘plash estetik zavq beradi. Har safar albomlarning turli kontseptsiyalari, uslublari, har xil dizaynlari bo‘ladi va ular javonda juda chiroyli ko‘rinadi.
Foto: Sevara
Men albomlarni koreys saytidan tanishim orqali buyurtma qilaman — uning Koreyada qarindoshlari bor, ular buyurtmalarni pochta orqali jo‘natishadi. Ammo hozirgi kunda Toshkentda K-pop mahsulotlari sotiladigan bir nechta do‘konlar ochildi.
Bir albomning narxi uning g‘oyasi, guruhning mashhurligi, cheklanganligi va shunga o‘xshash omillarga bog‘liq. Kolleksiyamdagi eng qimmat albomni 120 dollarga sotib olganman, o‘rtacha esa albomlar 25 dollar atrofida turadi. Ilgari men kartalarni ham to‘plardim, lekin hozir pulni bunga sarflash biroz afsusli tuyuladi. Mening eng qimmat kartam 20 dollar turadi, ammo ular 70–100 dollargacha ham yetishi mumkin.
Hozirda mening kolleksiyamda 30 ga yaqin albom bor. Yangi albomlarni yiliga taxminan 4 marta sotib olaman, bu sevimli ijrochilarim va guruhlarim qanchalik tez-tez yangi albom chiqarishlariga bog‘liq. O‘rtacha yiliga kolleksiyamga 250 dollarga yaqin pul sarflashim mumkin.
Men yana koreys kosmetikasiga qiziqaman, aydollar reklama qiladigan brendlar ham bor. Koreyada o‘qiyotganimda bir necha marta sotib olganman. Lekin bu arzon emas — bitta krem 50 dollargacha turishi mumkin.
Ba’zida san’atkorlar cheklangan miqdordagi vinil plastinkalar chiqarishadi — ularning narxi taxminan 150 dollar atrofida. Albatta, men ham xohlardim, ammo bu juda qimmat. Turli xil konsert mahsulotlari bor, masalan, dugonalarimdan biri 100 dollarga xudi buyurtma qilgan edi», — deydi Sevara.
Hozirgi kunda O‘zbekistonda K-pop muxlislari ko‘p, ehtimol bir necha ming: kaver-raqschilar va shunchaki ishqibozlar jamoalari mavjud. Ko‘pchilik bir-birini taniydi, aydollarning tug‘ilgan kunlariga bag‘ishlangan tadbirlarda uchrashadi, kafe yoki kovorkinglarda kino kechalari uyushtiradi, tanlovlarda qatnashadi. Muxlislar orasida taxminan 16 yoshdan 28 yoshgacha bo‘lgan yigit va qizlar bor.
Yoqtirgan narsalaringizga yaqinroq bo‘lishga intiling
Adler 27 yoshda, u davlat kompaniyasida IT mutaxassisi bo‘lib ishlaydi. Besh yil oldin u straykbol o‘yinini o‘zi uchun kashf etdi va o‘shandan beri muntazam ravishda bu o‘yinlarda ishtirok etib kelmoqda.
Foto: Adler
Straykbol — maxsus ishlab chiqarilgan yumshoq pnevmatik qurollardan foydalanib o‘ynaladigan jamoaviy harbiy-taktik o‘yin. Qurol (yuritma) elektr dvigatel, siqilgan gaz (gaz aralashmasi yoki karbonat angidrid) yordamida yoki o‘yinchining o‘z kuchi bilan ishga tushirilib, plastik sharlar otadi. O‘yinchining jihozlariga, shuningdek, ko‘zoynak kabi himoya anjomlar ham kiradi. O‘yinning asosiy tamoyili halollik bo‘lib, ma’lum qoidalar ham mavjud.
Straykbol Airsoftuz Arena hududida o‘ynaladi. Jamiyatning Telegramda chati bor, unda hozirda 200 ga yaqin a’zo mavjud — bu O‘zbekistondagi birinchi straykbol guruhi hisoblanadi.
«Asabiy ishimni hisobga olgan holda, men uchun straykbol — bu ajoyib dam olish, xotirjamlik, ruhiy tinchlik va shunga o‘xshash narsalardir... Bundan tashqari, men harbiy mavzuga juda qiziqaman va straykbol menga yoqadigan narsaga yaqinroq bo‘lishimga imkon beradi.
Odatda, biz har hafta o‘yinlarga chiqishga harakat qilamiz. Men shunchaki o‘yinchi sifatida qatnashaman, lekin jamoamizda tashkiliy masalalar bilan shug‘ullanadigan do‘stlarimiz ham bor.
Agar shaxsiy jihozlaringiz bo‘lmasa, taxminan 200–300 ming so‘mga qurol va anjomlarni ijaraga olishingiz mumkin. Sizga kerakli jihozlar va o‘yin davomiyligiga qarab turli xil narxlar mavjud.
Foto: Adler
Men 2 yil ichida deyarli barcha jihozlarni xarid qildim, faqat mayda-chuydalar qoldi. Yuritmani tanishimdan qo‘ldan sotib oldim — bu taxminan 1000–1200 dollar turdi, ekipirovka esa taxminan 400 dollarga tushdi. Ilgari Rossiya yoki Qozog‘istondan kelayotgan tanishlarimizga buyurtma berardik. Hozir mahalliy do‘kon bor, ammo u yerdagi narxlar yuqori. Yuritma va ekipirovkaning narxi juda xilma-xil bo‘lishi mumkin — bu sizning ehtiyojlaringiz va imkoniyatlaringizga bog‘liq.
O‘yin uchun jihozlar o‘zimniki bo‘lgani sababli, 40 mingdan 60 ming so‘mgacha to‘layman. Narx ishtirokchilar soniga bog‘liq, chunki biz hudud ijarasi summasini barcha o‘yinchilarga taqsimlaymiz. Men oyiga taxminan 2–3 marta boraman, demak, yiliga 1,5 million so‘m atrofida sarflashim mumkin, yuritma va shar uchun gaz uchun esa yana 2 million so‘mga yaqin ketadi», — deydi Adler.
Hozirda jamoamizda 200 ga yaqin odam bor, ular asosan toshkentliklar, lekin ko‘chib kelganlar ham bor. Ishtirokchilarning yoshi taxminan 20 dan 40 yoshgacha. Ko‘pchilik erkaklar, qizlar ham ba’zan kelib turishadi, lekin faqat 2–3 tasining o‘z jihozlari bor. Asosan, qizlar o‘yinchilarning jangovar do‘stlari».
His-tuyg‘ular jo‘shqinligi
Valeriya — We Digital agentligining ijrochi direktori. U 29 yoshda va taxminan olti yildan beri snoubordda uchadi.
Foto: Valeriya
«Men bu bilan dugonam tufayli shug‘ullana boshladim, u bolaligidan beri chang‘ida uchadi. Bir kuni u meni o‘zlari bilan tog‘ga borishga taklif qildi. Men snoubordni sinab ko‘rdim va o‘shandan beri unga qiziqib qoldim.
O‘sha paytlarda biz Bildirsoyda uchardik. Bu xavfli edi: hech qanday infratuzilma, qo‘riqlash xizmati, nazoratchilar, qutqaruvchilar va boshqa zarur narsalar yo‘q edi. Mahalliy murabbiylar bor edi, ular aslida professional emas, balki chang‘i va snoubordda juda yaxshi uchadigan oddiy yigitlar edi, chunki ular tug‘ilganidan beri o‘sha yerda yashar va shu bilan kun ko‘rishardi. Ular sening qo‘lingdan ushlab, to‘g‘ri cho‘qqidan tezlikda pastga olib tushishardi.
Bir-ikki yildan so‘ng Amirsoy ochildi va biz faqat u yerga boradigan bo‘ldik, chunki u yerda barcha zarur infratuzilma mavjud edi. Albatta, doimo murakkab so‘qmoqlar va yovvoyi joylarni izlaydigan tajribali snoubordchilar va chang‘ichilar ham bor. Lekin men bunday joylarga borishdan cho‘chiyman va menga Amirsoydagi tinch tog‘ yetarli — u yerda qo‘riqchilar, qutqaruvchilar va barcha sharoitlar mavjud.
Foto: Valeriya
Toshkentda mavsum dekabr oyining oxirlarida boshlanib, mart oyining oxirigacha davom etadi. Odatda biz mavsumni Navro‘z arafasida yakunlaymiz — hatto maxsus tadbir ham bor — «Choponrayd» nomli libosli poyga. Ba’zi sportchilar bizda hali mavsum boshlanmagan yoki tugagan paytda boshqa mamlakatlarga borishadi. Men ham, albatta, buni xohlardim, lekin hozircha O‘zbekistondan tashqarida uchish imkoniyatim bo‘lmadi.
Hozirgi kunda qishki sport turlari ancha ommalashgani bois, turli avlodlarga mansub ko‘plab guruhlar va to‘garaklar mavjud, biroq ilgarigidek yagona hamjamiyat endi yo‘q. Bilishimcha, 2000-yillarning boshida snoubordchilar, chang‘ichilar va boshqa qishki ekstremal sport ixlosmandlarining juda kuchli jamoasi bo‘lgan. O‘sha paytlarda infratuzilma yo‘q edi, shuning uchun ular hamfikrlarni topib, to‘planishar, joy qidirishar, yovvoyi tabiatda uchishar va Beldersoy cho‘qqisida tunab qolishar, shaharda birgalikda vaqt o‘tkazishar edi. Ta’riflarga ko‘ra, bu rok-n-rollga o‘xshash hayot tarzini eslatardi. Men bu sevimli mashg‘ulotimga kelganimda, bunday harakatlar allaqachon yo‘q edi. Hozir esa Amirsoy o‘z atrofida jamiyatni birlashtirmoqda va mavzuli tadbirlarni uyushtirmoqda.
Agar bu hordiqning narxi haqida gapiradigan bo‘lsak, xarajatlarni uchishning o‘zi va jihozlanishga bo‘lish mumkin.
Hozircha mavsum boshlanmagani sababli, yangi narxlar e’lon qilinmagan. O‘tgan yili skipas (barcha tepaliklarga chiqish imkonini beruvchi karta) bir kunga 350 ming so‘m turardi. Bundan tashqari, yo‘l xarajatlari qanday borishingizga bog‘liq. Biz do‘stlar bilan o‘z mashinamizda borardik, taxminan yarim bak benzin, ya’ni 200 ming so‘mga yaqin pul u yoq-bu yoqqa ketardi. Hududda bepul avtoturargoh bor, arqonga yaqinroq va qulayroq joydagi avtoturargoh esa 200 ming so‘mdan pullik. Hududda turli narx toifasidagi kafe-restoranlar mavjud; o‘rtacha bir kishi uchun tushlik narxi 150–200 ming so‘mga to‘g‘ri kelishi mumkin. Shunday qilib, bir kunda taxminan 1 million so‘mga yaqin pul sarflanadi. Mavsumda 8–10 marta uchaman, garchi har dam olish kunida uchishni xohlasam-da. Demak, bir mavsumda o‘z sevimli mashg‘ulotimga taxminan 8 million so‘m sarflayman.
O‘z jihozi va uskunasi bo‘lmaganlar uchun ijaraga qo‘shimcha mablag‘ ajratish kerak. Snoubord, chang‘i, maxsus kiyimlar (suv o‘tkazmaydigan shim, kurtka, qo‘lqop), niqob, dubulg‘a, botinkalarni to‘g‘ridan-to‘g‘ri Amirsoy'da yoki shahardagi boshqa joylarda ijaraga olish mumkin. Amirsoy'da narxlar yuqoriroq, lekin jihozlar yangiroq. O‘tgan yili snoubord ijarasi 150 ming, jihozlar esa 100–150 ming atrofida edi.
Yangi boshlovchilarga darhol o‘z jihozlarini sotib olmaslik tavsiya etiladi. Avval ko‘nikib, aynan o‘zingizga nima mos kelishini tushunib olish kerak. Dastlabki yillarda men ijaraga olardim, keyin esa o‘zimnikini sotib ola boshladim. Ko‘p narsalarni AQShdagi EVO veb-saytidan buyurtma qilaman, chunki Toshkentda, afsuski, tanlov kam, mavjudlari esa ancha qimmat.
Snoubordni 2 yil oldin buyurtma qilgan edim va hali almashtirmadim — o‘shanda u menga chegirma va yetkazib berish bilan 450 dollarga tushgan edi. Umuman olganda, narxlar brendga, aksiyalarga, mavsumga bog‘liq va juda yuqori bo‘lishi mumkin.
Bu mavsumda men ba’zi jihozlarimni yangiladim. Kurtka va shim uchun saytda aksiyalarni hisobga olgan holda 300 dollar to‘ladim. Agar Toshkentda sotib olinsa, ancha qimmatga tushadi, chunki tanlash imkoniyati kam. Urban do‘konidagi kurtka taxminan 4–5 million so‘m turishi mumkin. Botinkalarni u yerda chegirma bilan 2,5 millionga oldim, odatda esa narxlar 3 milliondan 5 milliongacha.
Slab kabi kichikroq do‘konlar ham bor — u yerda arzonroq va oddiyroq brendlar mavjud. O‘sha yerdan birinchi formamni sotib olgan edim va bir necha yil oldin bu menga 1,5 millionga tushgan edi. Hozirda Slabda shim va kurtkalar narxi 1 mln so‘mdan 2,5 mln so‘mgacha, botinkalar narxi esa 1 mln so‘mdan 3,5 mln so‘mgacha.
Bundan tashqari, dubulg‘a, niqob, termokiyim, qo‘lqop, g‘ilof kabi mayda-chuydalarga ham 500 dollar sarfladim. Bularni Qozog‘istondan onlayn buyurtma qilganman. Qisqasi, snoubord va barcha jihozlarga taxminan 1500 dollar ketdi.
Foto: Valeriya
Xobbiyim menga ko‘plab ijobiy his-tuyg‘ularni keltiradi. Bu tog‘dan tushayotganda ko‘rinadigan ajoyib go‘zallik, quvvat va fikrlarning tozalanishidir. Bunga qo‘shimcha ravishda, yaxshi hamrohlik va ruhan yaqin odamlar bilan muloqotdan olinadigan tetiklik ham bor. Shuningdek, bu ofis ishida juda yetishmaydigan faol jismoniy yuklama ekanligi aniq», — deydi Valeriya.
Lera sayohat va chang‘ida uchish uchun mavsumda taxminan 8 million sarflaydi.
Xobbi uchun sabab bo‘lishi shart emas
Po‘lat — 35 yoshli nazariyotchi fizik va universitetda o‘qituvchi. U taxminan 15 yil oldin Warhammer bilan qiziqishni boshlagan.
Foto: O‘zbekiston Warhammer hamjamiyati
Warhammer — bu qorong‘u fantaziya dunyosida sodir bo‘ladigan «vargeym» yoki strategik stol o‘yini. U stol o‘yinlari, kompyuter o‘yinlari, adabiyot, miniatyuralarni bo‘yash (o‘yinda ishlatiladigan figuralar), kospley va hatto memlarni o‘z ichiga olgan ulkan koinotdir.
Toshkentda Warhammer jamoasi mavjud bo‘lib, u taxminan 2018-yilda shakllangan, garchi bu mavzuga qiziquvchilar doimo bo‘lgan. Hozirda guruhda 140 kishi bor — deyarli barchasi O‘zbekistonda yashaydi, lekin ularning orasida 2022-yildan keyin Rossiyadan kelganlar ko‘p. Ishtirokchilar orasida turli kasb egalari bor: shifokorlar, muhandislar, huquqshunoslar, rassomlar, o‘qituvchilar va talabalar. Ularning aksariyati yigitlar, ammo bir nechta qizlar ham bor.
Foto: O‘zbekiston Warhammer hamjamiyati
«2018-yildan boshlab Hobby Games do‘koni o‘yinlar tashkil qilishni boshladi, lekin biz hali ham xobbi-kechalar o‘tkazib turamiz — ishtirokchilardan birining uyida yig‘ilib, birgalikda o‘yin o‘ynaymiz yoki miniatyuralarni bo‘yab chiqamiz. Mening xobbiyim — bu bo‘yash. O‘yinlarda esa unchalik ko‘p qatnashmayman. Men miniaturalarni o‘zim uchun yig‘aman va o‘z sahifamga joylayman hamda tanlovlarda ishtirok etaman.
Surat: Po‘lat — miniatyuralarni mualliflik uslubida ishlash
Hozirda o‘yinlar va turnirlar uchun xususiy maktablardan birining binosini ijaraga olamiz. Maktab direktori ham bizning hamjamiyatimiz a’zosi hisoblanadi. O‘yinlar har shanba kuni o‘tkaziladi. Muntazam qatnashmoqchi bo‘lganlar oyiga 100 ming so‘mlik abonement sotib olishadi yoki bir martalik kirish uchun 50 ming so‘m to‘lashadi. Yig‘ilgan mablag‘ ijara haqini qoplashga sarflanadi, qolgan qismi esa o‘yinlar uchun turli jihozlar xarid qilishga yo‘naltiriladi.
Foto: O‘zbekiston Warhammer hamjamiyati
Agar bu ish bilan jiddiy shug‘ullansang, bu arzon zavq emas. O‘rtacha hisobda, Games Workshop rasmiy ishlab chiqaruvchisining bitta qutisi 30 dollardan boshlanadi. Bir qutida bitta, uchta, beshta, o‘nta va undan ko‘p miniatyura bo‘lishi mumkin. Fidoyi o‘yinchilar butun boshli qo‘shinlarni to‘playdi. Tajribali o‘yinchilar yangi boshlovchilarga miniatyuralarni vaqtincha berishlari mumkin, lekin umuman olganda, o‘z «odamchalarini» boshqalarga berish odat tusiga kirmagan.
O‘yinni boshlash uchun hech bo‘lmaganda kichik bir bo‘linmani to‘plash kerak — aslida 100–150 dollar atrofida pul sarflash mumkin. Ammo bu ishga chuqurroq kirishib ketganingda, ancha ko‘p mablag‘ sarflaysan — chunki qo‘shiningni asta-sekin yaxshilashni xohlaysan, yangi miniatyuralar chiqadi va ularni sotib olishga ishtiyoq paydo bo‘ladi.
Foto: O‘zbekiston Warhammer hamjamiyati
Rasmiy miniatyuralarni Britaniyadan TEZ Parcel yetkazib berish xizmati orqali buyurtma qilamiz. Odatda bir necha kishi uchun umumiy buyurtma beramiz. Norasmiy yo‘llarni ham qidirib ko‘rish mumkin — masalan, Rossiyadan kelayotgan biror kishi orqali, chunki u yerda ko‘pchilik miniatyuralarni yelimlaydi. Yana bir yo‘l — sxemalarni yuklab olib, 3D bosma buyurtma qilish, ammo O‘zbekistonda bu Britaniyadan asl nusxasini buyurtma qilishdan qimmatroq tushadi, chunki 3D bosma sanoati hali yaxshi rivojlanmagan. Rivojlangan mamlakatlarda bunday usul ikki barobar arzonroq bo‘ladi.
Rasm chizish bilan shug‘ullanuvchilar uchun bo‘yoqlar va mo‘yqalamlar sotib olish kerak. Plastmassa uchun akril bo‘yoqlari zarur. Odatda bir tyubik 2,5 dollardan 8 dollargacha turadi. Sifatli rassomlik mo‘yqalamlari ham to‘g‘ri keladi. Men aerografdan ham foydalanaman, lekin bu majburiy emas. Umuman olganda, agar bo‘yashni boshlashni istasangiz, dastlab 50 dollarga jihozlanishingiz mumkin. Biroq, albatta, doimo yangi narsalar xohlanadi.
Men taxminan har ikki oyda biror narsa sotib olaman. Ko‘pincha bir xarid uchun 100 dollardan ortiq sarflamayman. Yiliga o‘rtacha 700–800 dollar atrofida xobbiga sarflayman. Ba’zida cheklangan sonli to‘plam yoki shunga o‘xshash narsalar istisno bo‘lishi mumkin. Lekin bu juda individual — bizning a’zolarimizdan biri bir safar 1700 dollarga xarid qilgan. Aytishim mumkinki, agar shahrimizda maxsus do‘konlar bo‘lganida, men xobbiga ancha ko‘proq pul sarflagan bo‘lardim.
Fantastik olamlarga oid ma’lumotlar (lore) bilan qiziquvchilar kitoblar va maxsus mahsulotlar sotib olishadi. Bir necha yil oldin kitoblar 100 ming so‘mdan boshlangan bo‘lsa, hozirgi kunda narxlar ancha ko‘tarilgan, tanlov ham uncha ko‘p emas. Bugun Kitob olami'da 480 mingdan 800 ming so‘mgacha bo‘lgan atigi bir nechta kitob mavjud. Biroq, masalan, Wildberries'da buyurtma berish mumkin — u yerda adabiyotlar 70 mingdan 2 million so‘mgacha turadi.
Menimcha, sevimli mashg‘ulotning sababi bo‘lishi shart emas. Men bu bilan biror maqsadga erishish yoki quvvatimni boshqa yo‘lga yo‘naltirish uchun shug‘ullanmayman. Men shunchaki bundan zavq olaman», — deydi Po‘lat.
Warhammer bilan kim va nima uchun qiziqishi hamda bu olam nima sababdan qiziqarli ekanligi haqidagi batafsil ma’lumotni shu yerda o‘qishingiz mumkin.
Xulosa
Ko‘rib turganingizdek, xobbilar juda xilma-xil bo‘lib, ko‘pincha qiziqishingiz jinsingiz, yoshingiz yoki kasbingizga bog‘liq bo‘lmaydi. Eng muhimi — bu sizga baxsh etadigan ijobiy hissiyotlar va baxt tuyg‘usidir. Ba’zida esa baxtning bir bo‘lagini qo‘lga kiritish uchun ma’lum miqdorda pul sarflashga to‘g‘ri keladi: kolleksiyangizni to‘ldirish, sayohat uchun to‘lov qilish yoki jihozlaringizni yangilash uchun. Bunday hollarda AVO platinum kredit kartasi yordamga keladi. Bu xalqaro kartadan nafaqat O‘zbekistonda, balki chet ellarda ham foydalanish mumkin, ayniqsa xorijiy saytlarda xarid qilish uchun juda qulaydir. Kartaning kredit limiti 50 million so‘mgacha yetadi, imtiyozli davr esa 45 kunni tashkil etadi.
*Maqoladagi ma'lumotlar nashr etilgan vaqt uchungina amal qiladi. AVO bank ushbu ma'lumotlar kelajakda ham xuddi shunday va dolzarb bo'lib qolishiga kafolat bermaydi. Qaror qabul qilishdan oldin eng so'nggi ma'lumotlarni tekshirishingizni maslahat beramiz.
*Maqoladagi fikr — muharrirning shaxsiy fikri bo'lib, u AVO bank pozitsiyasini ko'rsatmaydi. Bank ma'lumotlar to'g'riligi va undan foydalanish oqibatlari uchun javobgarlikni o'z zimmasiga olmaydi.
*Maqolada tashqi resurslarga havolalar keltirilgan. AVO bank tashqi resurslardagi ma'lumotlar uchun javobgarlikni o'z zimmasiga olmaydi.
*Narxlar taxminiy va faqat nashr etilgan vaqtdagina amal qiladi.
