JSHSHIR — bu jismoniy shaxsning shaxsiy identifikatsiya raqami. U O‘zbekiston fuqarolariga tug‘ilgan paytida beriladi va umr bo‘yi o‘zgarmay qoladi.
Qisqartmaning o‘zi «Jismoniy shaxsning shaxsiy identifikatsiya raqami» deb nomlanib, 14 ta raqamdan iborat. Bu raqamni pasportdan topish mumkin. Shuningdek, u davlat ma’lumotlar bazalarida saqlanadi va shaxsning barcha rasmiy hujjatlariga avtomatik ravishda biriktiriladi.
Bu raqamda tasodifiy sonlar emas, balki tug‘ilgan sana, jins va shaxsni boshqalardan ajratib turadigan individual raqam mavjud. Hatto 1 kunda tug‘ilgan va ismingiz bir xil bo‘lgan odam bilan ham JSHSHIRingiz farqli bo‘ladi.
JSHSHIR qayerda ishlatiladi?
Qisqacha aytganda — deyarli hamma joyda. U orqali tizim kimligingizni tushunadi va elektron xizmatlarda sizni «tanib oladi».
Masalan, shifokorga yozilmoqchi, bankda hisob ochmoqchi yoki my.gov.uz portalidan ma’lumotnoma olmoqchi bo‘lsangiz, tizim shaxsiy raqamingizni so‘raydi. U ma’lumotlarni tekshirib, sizni aniqlaydi va siz haqingizda manzilingiz, tibbiy kartangiz, soliq tarixingiz, mulkingiz kabi barcha ma’lumotlarni chiqarib beradi.
Aytaylik, bankdan kredit olyapsiz. Xodim JSHSHIRingizni kiritishi bilan ortiqcha qog‘ozbozliksiz barcha kerakli ma’lumotlarni bir zumda oladi.
JSHSHIR — davlat xizmatlari va hujjatlari bilan bog‘liq barcha eshiklarni ochadigan universal raqamli kalit, desa ham bo‘ladi.
Nima uchun shaxsiy JSHSHIRni bilish muhim?
2025-yilda JSHSHIRsiz raqamli davrga kira olmaysiz. Hozirda ko‘p ishlar onlayn hal bo‘lyapti va bu raqam sizning hamma narsa uchun shaxsiy kalitingizga aylanadi.
Agar ishga kirsangiz, nafaqa olsangiz yoki ma’lumotnoma rasmiylashtirsangiz — JSHSHIR birinchi navbatda kerak bo‘ladi. U xuddi siz ekanligingizni tasdiqlovchi loginga o‘xshaydi.
🚀 Deyarli tayyor
Biznes, hordiq, ta'mirlov — istagan xarajatingizga 100 mln so‘mgacha beramiz
Bundan tashqari, u xatoliklardan qochishga yordam beradi. Agar ismingiz noyob bo‘lsa — yaxshi. Lekin ismingiz, aytaylik, Azizbek Ahmedov bo‘lsa-yu, mamlakatda yana 100 nafar shunday ismli odam bo‘lsa-chi? Aynan shunday holatda JSHSHIR yordamga keladi: u kimligingizni aniq ko‘rsatib beradi va sizni hech kim adashtirib yubormaydi.
Xulosa
Hozirda O‘zbekiston katta qadamlar bilan raqamli davlatga aylanib boryapti. Bu o‘zgarish hamma sohada xalqqa porasiz, ortiqcha qog‘ozbozliksiz, asabiyliklarsiz, insof bilan xizmat qilishiga olib keladi. JSHSHIR esa aynan shu yo‘nalishdagi eng muhim qadamlardan biridir. U hayotni osonlashtiradi, tizimni esa adolatliroq va shaffofroq qiladi.
Shuning uchun, agar hali o‘z JSHSHIRingizni bilmasangiz — uni pasportingizdan topish yoki portal orqali bilib olishning ayni vaqti. Bu siz o‘ylaganingizdan ham ko‘proq kerak bo‘ladigan narsa.
